काठमाडौं । दयाहाङ राई र मिरुना मगरको शीर्ष भूमिका रहेको फिल्म ‘रंगेली’ नेपालसहित अमेरिका र अष्ट्रेलियामा एकैसाथ रिलिज हुने भएको छ । साथै, फिल्मलाई नेपाल रिलिजअघि नै अष्ट्रेलिया र अमेरिकामा प्रिमियर गरिने भएको छ ।
नेपालमा यस वर्षको महाशिवरात्रिको दिन फागुन २५ गते रिलिज हुने यो चलचित्र माघको अन्तिम हप्ता अस्ट्रेलियामा प्रिमियर गरिने पक्का भएको कार्यकारी निर्माता जीतेन्द्र खतिवडाले जानकारी दिए।
यस चलचित्रको लागि अस्ट्रेलियाको वितरक कम्पनी ‘हट बिट्स ईभेन्टस्’ले प्रिमियर तथा रिलिज गर्नेछ। प्रिमियरमा नेपालबाट कलाकारहरूसहितको चलचित्र टिम त्यहाँ पुग्नेछ। यस्तै सोही मिति वरपर अमेरिकामा पनि प्रिमियर हुने उनले बताए ।
अर्जुन सुवेदीको लेखन तथा निर्देशन रहेको ‘रंगेली’मा दयाहाङ राई, मिरुना मगर, अर्पण थापा, प्रवीण खतिवडा, रमेश बुढाथोकी लगायतको प्रमुख भूमिका छ । अहिले मोरङको रङ्गेली, कर्सिया, कटहरी, विराटनगर र झापाको बिर्तामोडमा छायांकन भइरहेको छ ।
फिल्मको एक गीत युरोपको प्रतिष्ठित ‘बुढापेस्ट अर्केस्ट्रा’मा लाइभ छायांकन हुनेछ । पहिलोपटक उक्त स्टुडियोमा नेपाली फिल्मको गीत रेकर्ड हुन लागेको जनाइएको छ । गीतमा हर्क साउदको शब्द रचना छ भने सनुप पौडेल र अन्नु चौधरीको स्वर रहनेछ । फिल्मका अन्य गीतमा भने सुशान्त गौतम र हर्कुलस बस्नेतको संगीत रहनेछ ।
फिल्मका कार्यकारी निर्मातामा जितेन्द्र खतिवडा र अनुजजंग थापा छन् । निर्माताहरू संसार चौलागाईं र रमेश भट्टराई वशिष्ठ हुन् भने युवक कार्की र शिव थपलिया सहनिर्माता हुन् । फिल्मलाई सुसन प्रजापतिले खिचिरहेका छन् ।
