काठमाडौं । ‘भगवत् गीता’ शीर्षकको अगाडि ‘एक’ थप्दै नेपाली फिल्म ‘एक भगवत् गीता’ को टिजर सार्वजनिक गरिएको छ ।
शुक्रबार युट्युबमा सार्वजनिक १ मिनेट ३२ सेकेण्डको टिजरमा अभिनेता विपिन कार्कीको लुक्स र भूमिकाले ‘सरप्राइज’ बनाउन सक्छ । ट्रान्सजेन्डर महिलाको भूमिकामा उनी प्रस्तुत छन् । टिजरमा उनलाई कमलामाई अवतारमा चित्रण गरिएको छ । विपिनको चरित्र हिंसात्मक भावको देखिएको छ ।
टिजर जनकपुरधामस्थित जानकी मन्दिरबाट सुरु छ । अभिनेत्री सुहाना थापा डराएको भावमा देखिएकी छन् भने अभिनेता धिरज मगर गुरुङ परिहनमा प्रस्तुत छन् । उनीहरुले कम ‘स्क्रिन स्पेश’ पाएको टिजरमा विपिन कार्की हाइलाइटमा छन् । वेश्यालयको कथालाई फिल्मले उठाएको हुनसक्ने टिजरबाट बुझाउँछ । विपिनको लुक्सले नै फिल्मप्रति दर्शकमा कौतुहलता बढाउन सक्छ ।
झरना थापाद्वारा निर्देशित फिल्ममा कबीर खड्का, जेविस र जेविन श्रेष्ठ, संजोग रसाइली, मुकेश झा, अनुराग कुँवर, राम कैलाश ठाकुर, धिरज ठाकुरलगायतको पनि अभिनय छ । सुनिल कुमार थापाको निर्माण रहेको फिल्मको कथा निर्देशक थापा स्वयंको हो । झरनासँगै सरिन पोखरेल, परिक्षेद सेन, पुरुषोत्तम ढंगेल र कृष्णको पटकथा रहेको फिल्ममा परिक्षेद र पुरुषोत्तमको संवाद छ ।
राजेश श्रेष्ठको छायांकन, मित्र डि गुरुङको सम्पादन, हिमाल केसीको द्वन्द्व, कविराज गहतराजको कोरियोग्राफी तथा शैलेश श्रेष्ठको ब्याकग्राउण्ड स्कोर रहेको फिल्मको निर्माता सुहाना थापा हुन् । झरनालाई ‘ए’ शब्द फापेको छ । उनी निर्देशित ‘ए मेरो हजुर’का तीनटै सिरिज सफल भएका थिए । यसैले उनले ‘भगवत् गीता’मा पनि ‘ए’ शब्द राखेकी हुन् । फिल्म भदौ २९ गते प्रदर्शन हुँदैछ ।
