काठमाडौं । अभिनेत्री गरिमा पन्तले दोस्रो सन्तान जन्माएकी छन् । दुई वर्षअघि पहिलो सन्तानको रुपमा छोरीलाई जन्म दिएकी उनलाई दोस्रो सन्तान पनि छोरी नै भएको छ ।
उनले दुई छोरीको तस्बिर सामाजिक सञ्जालमा सेअर गर्दै खुसी साटेकी छन् । गरिमाले आइतबार बेल्जियमको अस्पतालमा छोरीलाई जन्म दिएको जानकारी प्राप्त भएको छ । पहिलो छोरी पनि उनले बेल्जियममा नै जन्माएकी थिइन् ।
२०७३ सालमा बेल्जियम बस्ने हरि थपलियासँग विवाह बन्धनमा बाँधिएपछि गरिमाले फिल्मबाट दूरी बनाएकी छन् । उनले फिल्ममा काम नगरेको ७ वर्षभन्दा बढी भइसकेको छ ।
पछिल्लो पटक फिल्म ‘तीन घुम्ती’मा देखिएकी उनले २०७० सालमा प्रदर्शन भएको फिल्म ‘झोला’बाट राष्ट्रिय अवार्डका साथै सार्क फिल्म फेस्टिभलमा सर्वोत्कृष्ट अभिनेत्रीको अवार्डसमेत जित्न सफल भएकी थिइन् ।
अहिले उनले श्रीमानसँग मिलेर बेल्जियममै व्यवसाय सञ्चालन गर्दै आएकी छन् । भलाद्मी अभिनेत्रीको छवि बनाएकी उनले ‘जीवन मृत्यु’, प्रितीको फूल’, ‘दिदी भाइ’, ‘मनले मनलाई छुन्छ’, ‘ठूली’, ‘फूल, ‘सुन्दर मेरो नाम’ लगायतका दुई दर्जन बढी फिल्ममा अभिनय गरेकी छन् । उनको डेब्यू फिल्म भने ‘निखिल दाइ’ थियो । यसपछि उनको करिअर सुखद रुपमा अगाडि बढेको थियो ।
