काठमाडौं, ८ असार । पोखरामा आजदेखि सुरु भएको नेपाल-चीन फ्रेन्डसीप ‘ड्रागन बोट रेस फेस्टिभल’मा नेपालका दुई र चीनका दुई टोली सेमिफाइनलमा प्रवेश गरेका छन् ।
फेवातालमा भएको सो प्रतियोगितामा नेपालका चार र चिनियाँ चार गरी आठ टोलीबीचको प्रतिस्पर्धामा दुई-दुई टोली अघिल्लो चरणमा प्रवेश गर्न सफल भए । प्रतियोगितामा दुई सय र पाँच सय मिटरको दुई-दुई चरणको प्रतिस्पर्धाबाट सेमिफाइनल प्रवेश गर्ने टोली छनोट गरिएको हो । प्रतियोगिताको सेमिफाइनल र फाइनल शनिबार हुनेछ ।
नेपालको र्याफ्टिङ एन्ड क्यानोइङ एशोसिएसन (एनआरसीए) र नेपाल एशोसिएसन अफ र्याफ्टिङ एजेन्सिज (नारा) तथा चीनको सिचुवाङ ड्रागन समूह र युनान ड्रागन समूह अघिल्लो चरणमा पर्न सफल भएको प्रतियोगिताका प्राविधिक प्रमुख मीनबहादुर मगरले जानकारी दिए ।
बोट रेसको दुई सय मिटरमा सिचुवाङले एक मिनेट ४८ सेकेन्ड र पाँच सय मिटरमा भने चार मिनेट ३८ सेकेन्डमा निर्धारित दूरी पार गरेको थियो । नेपालको नाराको टोलीले दुई सय मिटरको दूरी एक मिनेट ५३ सेकेन्डमा पार गर्न सफल भयो । यसैगरी पाँच सय मिटर पार गर्न चार मिनेट ४७ सेकेन्ड समय लगाएको थियो ।
युनानको टोलीले दुई सय मिटरको दूरी एक मिनेट ५५ सेकेन्डमा र पाँच सय मिटरको दूरी भने चार मिनेट ५३ सेकेन्डमा पार गरेको थियो । नेपालको एनआरसीएले दुई सय मिटरको दूरी एक मिनेट ५६ सेकेन्डमा र पाँच सय मिटरको दूरी पाँच मिनेट दुई सेकेन्डमा सम्पन्न गरी अघिल्लो चरणको यात्रा तय गर्न सफल भयो ।
चाइना नेपाल फ्रेन्डसीप, पोखरा महानगरपालिका, सिङ्गापुरको जिएस ड्रागन समूह र फेवा डुङ्गा व्यवसायी सङ्गठनको टोली बाहिरिएका छन् । प्रतियोगितामा विजेता हुने टिमलाई जनही रु पाँच लाख ५० हजार र उपविजेतालाई रु तीन लाख ५० हजारका दरले पुरस्कार प्रदान गरिने पोखरा महानगरका पर्यटन विकास समितिका उपाध्यक्ष रवीन्द्रराज पौडेलले जानकारी दिए ।
नेपाल पर्यटन बोर्ड, नेपालस्थित चिनियाँ दूतावास र पोखरा महानगरपालिकाको आयोजनामा फेवातालमा पहिलोपटक ड्रागन बोट रेस तथा महोत्सव आयोजना गरिएको छ । महोत्सवको आज एक भव्य समारोहका बीच संस्कृति, पर्यटन तथा नागरिक उड्डयनमन्त्री सुदन किरातीले उद्घाटन गरेका थिए ।
नेपाल र छिमेकी मित्रराष्ट्र चीनबीचको सांस्कृतिक तथा जनस्तरसम्मको सम्बन्ध सुमधुर बनाउने र पर्यटन प्रवर्द्धन गर्ने उद्देश्यले बोट रेस तथा फेस्टिभलको आयोजना गरिएको नेपाल पर्यटन बोर्डले जनाएको छ । पोखरा पर्यटन परिषद् र चाइनिज ओभरसिज एशोसिएसन पोखरा सो फेस्टिभलको सहयोगी संस्थाका रूपमा रहेका छन् ।
