काठमाडौं । नेपाली कलाकार सुरक्षा पन्त अभिनित ‘द एट माउन्टेन्स’ पछिल्लो ६ महिनाकै सर्वोत्कृष्ट फिल्मको सूचीमा परेको छ । भेराइटी र हलिउड रिपोर्टर म्यागजिनले आधा वर्षका सर्वोत्कृष्ट फिल्मको सूची प्रकाशमा ल्याएका हुन् ।
भेराइटीले १० यस्ता उत्कृष्ट फिल्मको सूची सार्वजनिक गरेको छ, जसमा नेपालमासमेत छायांकन गरिएको इटालीको फिल्म ‘द एट माउन्टेन्स’ पनि अटाएको छ । भेराइटीले यो फिल्मलाई दोस्रो स्थानमा सूचीकृत गर्दै फिल्मको प्रशंसा गरेको छ । यो फिल्ममा नेपाली कलाकारहरु सुरक्षा पन्त, चेचे गुरुङ र वान्डी गुरुङलेसमेत अभिनय गरेका छन् ।
यो फिल्मले मित्रता र आत्मखोजको एक यात्रालाई रोमाञ्चक ढंगले पेश गरेको छ । इटालीको पहाडमा सेट गरिएको यो फिल्मले पिट्रो र ब्रुनोबीचको गहिरो र जटिल सम्बन्धलाई चार दशकसम्म पछ्याउँछ । यो फिल्मलाई सन् २०२२ मा कान्स फिल्म फेस्टिभलमा प्रिमियर गरिएको थियो ।
भेराइटीले यो फिल्मलाई सान्दर्भिक र यथार्थपरक फिल्म भन्दै प्रशंसा गरेको छ । उनीहरु घुम्दै आउने क्रममा नेपालमा आउँछन् र यसमा नेपालको कथावस्तु पनि बुनिएको छ । फिल्ममा सुरक्षाको छोटो तर मनछुने भूमिका छ ।
यो फिल्मबाटै सुरक्षाले कान्स फिल्म फेस्टिभलको प्रिमियरमा सहभागिता जनाएकी थिइन् । केही साताअघि चलचित्र समीक्षक समाजले यो फिल्मलाई मार्टिन चौतारीमा विशेष प्रदर्शन र अन्तरक्रिया पनि चलाएको थियो । भेराइटीको सूचीको शीर्षस्थानमा अर्को अमेरिकी फिल्म ‘एयर’ छ । तेस्रो स्थानमा ‘फेलिमिन हट’ छ ।
