भोजपुर । संस्कृति, पर्यटन तथा नागरिक उड्डयनमन्त्री सुदन किरातीले भोजपुरको एक मात्र विमानस्थलमा बन्न लागेको नयाँ टर्मिनल तथा कन्ट्रोल टावर भवनको शिलान्यास गरेका छन् ।
भोजपुर नगरपालिका–१२, टक्सारमा रहेको विमानस्थलमा बन्न लागेको भवनको मन्त्री किरातीले शुक्रबार मुन्दुम तथा सनातन विधिअनुसार शिलान्यास गरेका हुन् ।
सो क्रममा उनले सुविधा सम्पन्न टर्मिनल भवन निर्माणसँगै आगामी दिनमा ठूला जहाज उडानका लागि पहल गर्दै जानुपर्ने बताए । एक जनाले मात्र सुविधा पाए पनि पहाडी विमानस्थलहरू सुविधा सम्पन्न हुनुपर्ने मन्त्री किरातीको भनाइ छ । नेपाल वायुसेवा निगमले अन्य क्षेत्रमा देखिएका विकृति विसङ्गति अन्त्यका लागि पनि प्रभावकारी भूमिका निर्वाह गर्न जरुरी रहेको उनले बताए ।
आरवी उर्वन बिल्डर्स एण्ड सप्लायर्स प्रालिले निर्माण गर्न लागेको भवनको कूल लागत रु पाँच करोड ४५ लाख रहेको नेपाल नागरिक उड्डययन प्राधिकरणका महानिर्देशक प्रदीप अधिकारीले जानकारी दिए । आगामी डेढ वर्षभित्रमा निर्माण कार्य सम्पन्न हुने गरी निर्माण कम्पनीसँग सम्झौता भएको छ । एक रोपनी पाँच आना क्षेत्रफलमा निर्माण हुने भवन एक सय जनाले एकै पटक उपयोग गर्न सक्ने छन् ।
पहाडी क्षेत्रहरूमा सञ्चालन भई विमानस्थलबाट नाफा नभए पनि सेवा मात्र दिने कार्य भइरहेको बताउँदै महानिर्देशक अधिकारीले ५५ विमानस्थलमध्ये हाल ३३ वटा मात्र सञ्चालनमा आएको बताए ।
भोजपुर विमानस्थलको कूल क्षेत्रफल एक सय ३२ रोपनी रहेको छ भने पाँच सय ४५ मिटर लम्बाइ र २० मिटर चौडाइ भएको धावनमार्ग छ । भोजपुरमा हाल नेपाल वायुसेवा निगमको जहाजले मात्र भोजपुर-काठमाडौँ उडान गर्दै आइरहेको छ । करिब ४५ वर्षदेखि सञ्चालनमा आएको विमानस्थलको धावनमार्ग २०७४ सालमा कालोपत्र भएको थियो ।
शिलान्न्यासका क्रममा भोजपुरबाट निर्वाचित कोशी प्रदेशसभा सदस्य बिनोद बान्तवा र भोजपुर नगरपालिकाका मेयर कैलाश कुमार आलेले भवन निर्माणसँगै भोजपुर जस्तो दुर्गम जिल्लाका नागरिकहरूले अझै प्रभावकारी सेवा पाउने बताए ।
